រដ្ឋបាលក្រុងស្វាយរៀង បានរៀបចំកិច្ចប្រជុំបូកសរុបលទ្ធផលការងារប្រចាំខែវិច្ឆិកា ឆ្នាំ២០២២ និងទិសដៅអនុវត្តបន្ត របស់រដ្ឋបាលក្រុងស្វាយរៀង

ខេត្ដស្វាយរៀង៖ រដ្ឋបាលក្រុងស្វាយរៀង បានរៀបចំកិច្ចប្រជុំបូកសរុបលទ្ធផលការងារប្រចាំខែវិច្ឆិកា ឆ្នាំ២០២២ និងទិសដៅអនុវត្តបន្ត របស់រដ្ឋបាលក្រុងស្វាយរៀង ក្រោមអធិបតីភាពលោក ណុប ចំរើន អភិបាល នៃគណៈអភិបាលក្រុងស្វាយរៀង។
កិច្ចប្រជុំនេះធ្វើឡើងនៅថ្ងៃសុក្រ ៣រោច ខែកត្តិក ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី១១ ខែវិច្ឆិកា ឆ្នាំ២០២២ នេះ ។
ក្នុងកិច្ចប្រជុំនោះដែរ មានការអញ្ជើញចូលរួមពីលោក លោកស្រីអភិបាលរងក្រុង លោក លោកស្រីនាយក នាយករងរដ្ឋបាលសាលាក្រុង កងកម្លាំងទាំង៣ចំណុះរដ្ឋបាលក្រុង លោក លោកស្រីប្រធានការិយាល័យ អង្គភាពទាំង១៣ ចំណុះសាលាក្រុង លោក លោកស្រីចៅសង្កាត់ និងនាយប៉ុស្តិ៍រដ្ឋបាលសង្កាត់ ទាំង ៧ក្នុងក្រុង។
ថ្លែងក្នុងឱកាសនោះដែរ លោកអភិបាលក្រុង បានមានប្រសាសន៍ថ្លែងអំណរគុណ និងកោតសរសើរ ដល់លោក លោកស្រី ជាមន្ត្រីរាជការ កងកម្លាំង និងអាជ្ញារធរមូលដ្ឋានគ្រប់លំដាប់ថ្នាក់ក្នុងក្រុងស្វាយរៀង ដែលតែងតែចូលរួមសហការ និងអនុវត្តតាមតួនាទីភារកិច្ចរបស់ខ្លួនប្រកបដោយឆន្ទៈ និងស្មារតីទទួលខុសត្រូវខ្ពស់ ដែលបានបង្ហាញ នូវលទ្ធផលការងារល្អទាំងការផ្តល់សេវាសាធារណៈ និងការថែរក្សាសន្ដិសុខ សុវត្ថិភាពជូនដល់ប្រជាពលរដ្ឋ។
លោក បានបន្ថែមថា ទោះបីទទួលបានលទ្ធផលការងារល្អគួរកត់សម្គាល់ក្តី ក៏នៅមានបញ្ហាមួយចំនួនទៀត ដែលទាមទារឱ្យលោក លោកស្រីបន្តខិតខំបន្ថែមដើម្បីបំពេញជូនប្រជាពលរដ្ឋ។
លោកអភិបាលក្រុងស្វាយរៀង បានដាក់ចេញនូវទិសដៅអនុវត្តបន្តចំនួន ៦ចំណុចដូចខាងក្រោម៖
១.ពង្រឹងយន្តការគ្រប់គ្រងទប់ស្កាត់សំណង់អនាធិបតេយ្យគ្មានច្បាប់អនុញ្ញាត និងសណ្ដាប់ធ្នាប់សាធារណៈ
២.ពង្រឹងការអនុវត្តផែនការវេនប្រចាំបញ្ជារបស់រដ្ឋបាលក្រុង និងសង្កាត់
៣.ជំរុញផ្សព្វផ្សាយប្រជាពលរដ្ឋគ្រប់អាយុបោះឆ្នោត ទៅពិនិត្យបញ្ជីឈ្មោះបោះឆ្នោត និងចុះឈ្មោះបោះឆ្នោត
៤.បន្តយកចិត្តទុកដាក់ខ្ពស់លើការផ្តល់សេវាសាធារណៈជូនប្រជាពលរដ្ឋ(យន្តការច្រកចេញចូលតែមួយ)
៥.សង្កាត់ទាំង៧ត្រូវរៀបចំស្លាកលេខផ្ទះ ជូនប្រជាពលរដ្ឋឱ្យបានគ្រប់ខ្នងផ្ទះ
៦.បន្តយកចិត្តទុកដាក់ តាមដានការអនុវត្តគោលនយោបាយភូមិ ឃុំ សង្កាត់ មានសុវត្ថិភាព ឱ្យមានប្រសិទ្ធភាពខ្ពស់ ។