ឯកឧត្តមបណ្ឌិតសុខប្រសិទ្ធិ និងគណៈប្រតិភូបានចូលជួបសំដែងការគួរសមនិងអបអរសាទរ ឯកឧត្តម ម៉ាង សុីណេត ឡើងអភិបាលខេត្តព្រះសីហនុថ្មីៗនេះ

 

ខេត្តព្រះសីហនុ៖នារសៀលថ្ងៃទី៤ ខែកក្កដា ឆ្នាំ២០២៤ ឯកឧត្តមបណ្ឌិត សុខ ប្រសិទ្ធិ ទីប្រឹក្សាផ្ទាល់សម្តេចមហាបវរធិបតី ហ៊ុន ម៉ាណែត និងជារដ្ឋលេខាធិការក្រសួងព័ត៌មាន និង ឯកឧត្តម ពៅ ផនសំណាង អនុរដ្ឋលេខាធិការ ក្រសួងព័ត៌មាន និង លោក ព្រាប ម៉ាណែល អភិបាលរងខណ្ឌ ពោធិសែនជ័យ រួមទាំង គណៈប្រតិភូទាំងអស់ ចូលរួមអបអរសាទរ ឯកឧត្តម ម៉ាង ស៊ីណេត ( ជាសម្លាញ់មហាមិត្ត និង ក្រុមការងារ អ ម ត) ដែលត្រូវបានព្រះមហាក្សត្រត្រាស់បង្គាប់តែងតាំងជាអភិបាល នៃគណ:អភិបាលខេត្តព្រះសីហនុ។
ក្នុងឱកាសដែលឯកឧត្តមទទួលបានត្រាស់បង្គាប់តែងតាំងជាអភិបាលខេត្តព្រះសីហនុ។ នេះជាព្រឹត្តិការណ៍ដ៏មានសារៈសំខាន់មួយ ដែលបង្ហាញពីការទទួលស្គាល់ និងការវាយតម្លៃខ្ពស់ចំពោះសមត្ថភាព និងគុណសម្បត្តិរបស់ ឯកឧត្តម ម៉ាង ស៊ីណេត ក្នុងការដឹកនាំរដ្ឋបាលខេត្តព្រះសីហនុ។
ឯកឧត្តម សុខ ប្រសិទ្ធិ បានថ្លែងអំណរគុណ និងកោតសរសើរចំពោះស្នាដៃដ៏ធំធេង ដែលឯកឧត្តម ម៉ាង ស៊ីណេត បានសម្រេចក្នុងតួនាទីជាអភិបាលរងខេត្តព្រះសីហនុពីមុនមក។ លោករដ្ឋលេខាធិការក៏បានបង្ហាញជំនឿយ៉ាងមុតមាំថា ក្រោមការដឹកនាំរបស់ ឯកឧត្តម ម៉ាង ស៊ីណេត ខេត្តព្រះសីហនុនឹងបន្តទទួលបានជោគជ័យ និងសម្រេចបានសមិទ្ធផលថ្មីៗបន្ថែមទៀត ក្នុងការអភិវឌ្ឍសេដ្ឋកិច្ច សង្គម និងវប្បធម៌។
ខេត្តព្រះសីហនុ គឺជាខេត្តមួយដ៏មានសក្តានុពលខ្ពស់ ដែលមានតួនាទីយ៉ាងសំខាន់ក្នុងការជំរុញកំណើនសេដ្ឋកិច្ចជាតិ។ ខេត្តនេះ មានធនធានធម្មជាតិ និងសក្តានុពលទេសចរណ៍ដ៏សម្បូរបែប។ ក្រោមការដឹកនាំដ៏ឈ្លាសវៃរបស់ ឯកឧត្តម ម៉ាង ស៊ីណេត អភិបាលនៃគណៈអភិបាល ខេត្តព្រះសីហនុ នឹងអាចប្រើប្រាស់ធនធានកម្លាំងកាយចិត្តទាំងអស់នេះ ដើម្បីទាក់ទាញការវិនិយោគ បង្កើតការងារ និងលើកកម្ពស់ជីវភាពរស់នៅរបស់ប្រជាពលរដ្ឋ។
ក្នុងឱកាសនោះ ឯកឧត្តមបណ្ឌិត សុខ ប្រសិទ្ធិ ក៏បានសន្យាថា ក្រសួងព័ត៌មាននឹងបន្តគាំទ្រ និងសហការយ៉ាងជិតស្និទ្ធជាមួយរដ្ឋបាលខេត្តព្រះសីហនុ ក្នុងការផ្សព្វផ្សាយព័ត៌មាន និងកសាងភាពវិជ្ជមានរបស់ខេត្ត។ ឯកឧត្តមបណ្ឌិត សុខប្រសិទ្ធ សង្ឃឹមថា កិច្ចសហប្រតិបត្តិការនេះ នឹងរួមចំណែកដល់ការអភិវឌ្ឍខេត្តព្រះសីហនុ ឱ្យកាន់តែរីកចម្រើនថែមទៀត។

សរុបមក ពិធីអបអរសាទរនេះ គឺជាការបង្ហាញពីការគាំទ្រ និងការជឿទុកចិត្តពីសំណាក់ថ្នាក់ដឹកនាំក្រសួងព័ត៌មាន ចំពោះ ឯកឧត្តម ម៉ាង ស៊ីណេត ក្នុងការដឹកនាំរដ្ឋបាលខេត្តព្រះសីហនុ។ វាក៏ជាការបើកទំព័រថ្មីមួយសម្រាប់កិច្ចសហប្រតិបត្តិការរវាងក្រសួងព័ត៌មាន និងរដ្ឋបាលខេត្ត ដើម្បីរួមគ្នាអភិវឌ្ឍខេត្តព្រះសីហនុឱ្យកាន់តែរីកចម្រើន និងទទួលបានជោគជ័យថ្មីៗបន្ថែមទៀត។

ជាចុងក្រោយ ឯកឧត្តមបណ្ឌិត សុខ ប្រសិទ្ធិ សម្តែងនូវក្តីរីករាយ និង ជូនពរជ័យចំពោះ ឯកឧត្តមអភិបាលខេត្ត ក្នុងការទទួលភារកិច្ចថ្មីក្រោមការអនុវត្ត គោលនយោបាយ យុទ្ធសាស្ត្រ បញ្ចកោណ ដែលដឹកនាំដ៏ឈ្លៀសវៃ ក្រោមការដឹកនាំដ៏ខ្ពង់ខ្ពស់ របស់ សម្តេចមហាបវរ ធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងសូមទទួលបានជោគជ័យ និងការអភិវឌ្ឍន៍ ព្រមទាំងសម្រេចគ្រប់ភារកិច្ច ។ខ្លា ឃ្មុំទឹកកក