ខេត្តកំពង់ធំ៖ នៅព្រឹកថ្ងៃទី២៩ ខែមិថុនា ឆ្នាំ២០២៥ នៅទីស្នាក់ការគណបក្សប្រជាជនកម្ពុជា ឃុំដងកាំបិត ស្រុកសណ្ដាន់ ខេត្តកំពង់ធំ បានរៀបចំប្រារព្ធពិធីមីទ្ទីង អបអរសាទរខួបអនុស្សាវរីយ៍លើកទី ៧៤ ថ្ងៃបង្កើតគណបក្សប្រជាជនកម្ពុជា ដែលពិធីនេះ ប្រព្រឹត្តទៅស្ថិតក្រោមអធិបតីភាពឯកឧត្តម សោម ស៊ុន សមាជិកអចិន្ត្រៃយ៍គណបក្សខេត្ត អនុប្រធានក្រុមការងារគណបក្សចុះមូលដ្ឋានស្រុក និងជាប្រធានក្រុមការងាររបស់គណបក្សចុះមូលដ្ឋានឃុំដងកាំបិត ស្រុកសណ្ដាន់ ខេត្តកំពង់ធំ។ ដោយមានការចូលរួមពីសមាជិកសមាជិការបស់គណបក្ស រួមជាមួយក្រុមការងារប្រមាណជាង៣៥០នាក់ ផងដែរ ។
ជាកិច្ចចាប់ផ្ដើម ឯកឧត្តម សោម ស៊ុន បានឡើងអានសន្ទរកថារបស់សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ប្រធានព្រឹទ្ធសភានៃព្រះរាជាណាចក្រកម្ពុជា ដែលសម្ដេចលោកបានថ្លែងក្នុងពិធីមីទ្ទីងរំលឹកខួបលើកទី៧៤ ថ្ងៃបង្កើតគណបក្សប្រជាជនកម្ពុជានៅថ្ងៃទី២៨ ខែមិថុនា ឆ្នាំ ២០២៥ ម្សិលមិញនេះ នៅទីក្រុងភ្នំពេញ ដោយមានមហាជនចូលរួមយ៉ាងច្រើនកុះករ ។
ឯកឧត្តម សោម ស៊ុន បានគូសបញ្ជាក់ តាមខ្លឹមសារនៃសន្ទរកថា របស់សម្ដេចប្រធានគណបក្ស ដែលបញ្ជាក់ថា គណបក្សប្រជាជនកម្ពុជាត្រូវបានបង្កើតឡើងនៅថ្ងៃទី២៨ ខែមិថុនា ឆ្នាំ១៩៥១ មានប្រភពពីចលនាតស៊ូរបស់ប្រជាជនប្រឆាំងអាណានិគមនិយមដើម្បីឯករាជ្យជាតិ រួមកៀកស្មាយ៉ាងចិត្តស្និទ្ធជាមួយចលនាតស៊ូរបស់ប្រជាជនវៀតណាម និងប្រជាជនឡាវ ដែលមានសត្រូវរួមគឺពួកអាណានិគមនិយម។
ឯកឧត្តម សោម ស៊ុន ក៏បានគូសបញ្ជាក់តាមសន្ទរកថាបន្ថែមទៀតថា ឆ្លងកាត់រយៈពេល៧៤ ឆ្នាំកន្លងមកនេះ បានបង្ហាញច្បាស់ថា មានតែគណបក្សប្រជាជនកម្ពុជាតែមួយគត់ ដែលបានផ្សារភ្ជាប់រួមសុខរួមទុក្ខជាមួយប្រជាជននៅគ្រប់កាលៈទេសៈ ពិសេសបានវាយផ្ដួលរំលំរបបប្រល័យពូជសាសន៍ប៉ុលពត អៀងសារី ខៀវសំផន រំដោះអាយុជីវិតប្រជាជនកម្ពុជារាប់លាននាក់ឲ្យរួចផុតពីរបបវាលពិឃាដ ទទួលបានជ័យជម្នះនៅថ្ងៃទី៧ ខែមករា ឆ្នាំ១៩៧៩ ហើយនៅឆ្នាំ១៩៩៨ សម្ដេចតេជោ ហ៊ុន សែន ប្រធានគណបក្ស និងជានាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវនយោបាយឈ្នះ ឈ្នះ នាំមកនូវសុខសន្តិភាព និងការឯកភាពជាតិពេញលេញដូចសព្វថ្ងៃនេះ ។
ឯកឧត្តម សោម ស៊ុន ក៏បានគូសបញ្ជាក់បន្ថែមទៀតថា បច្ចុប្បន្ននេះក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត អនុប្រធានគណបក្ស នាយករដ្ឋមន្ត្រីនៃព្រះរាជាណាចក្រកម្ពុជា បានបន្តដឹកនាំ ថែរក្សា ការពារសន្តិភាព និងកសាងអភិវឌ្ឍន៍ប្រទេសជាតិ ឲ្យមានការរីកចម្រើនរុងរឿង លើគ្រប់វិស័យ ។ ហើយបច្ចុប្បន្ននេះកំពុងចាត់វិធានការយ៉ាងមុឺងម៉ាត់ក្នុងការការពារបូរណភាពទឹកដីនៅតាមខ្សែបន្ទាត់ព្រំដែនកម្ពុជាថៃ និងការដោះស្រាយតាមផ្លូវច្បាប់ទៅកាន់តុលាការយុត្តិធម៌អន្តរជាតិ អាយសុីជេ នៅតំបន់ប្រសាទតាមាន់តូច ប្រាសាទតាមាន់ធំ ប្រាសាទតាក្របី និងតំបន់មុំបី ។
កញ្ញា ឈុំ ឆេងហ័រ តំណាងឲ្យអង្គមីទ្ទីង បានឡើងធ្វេីកាចាប់អារម្មណ៍និងប្តេជ្ញាចិត្ត ក្នុងការឆ្លេីយតបនូវគុណូបការៈដ៍ធំធេងរបស់គណបក្ស អស់រយៈពេល៧៤ឆ្នាំកន្លងទៅ ដូចតទៅ ៖
១-ប្តេជ្ញា គាំទ្រ និងដើរតាមមាគ៌ាដឹកនាំរបស់គណបក្សប្រជាជនកម្ពុជា ជាដាច់ខាត ។
២-ប្តេជ្ញា ពង្រឹងសាមគ្គីជាតិ សាមគ្គីរវាងគណបក្ស និងប្រជាជនឲ្យកាន់តែរឹងមាំ ជាដាច់ខាត ។
៣-ប្តេជ្ញា អនុវត្ត កម្មវិធីនយោបាយរបស់គណបក្ស ឲ្យបានសម្រេចជោគជ័យ ជាដាច់ខាត ។
- ជយោ គណបក្សប្រជាជនកម្ពុជា
No comments:
Post a Comment