ពិធីអបអរសាទរ ទិវាជាតិអប់រំបណ្ដុះបណាលបច្ចេកទេសវិជ្ជាជីវៈលើកទី ៥ឆ្នាំ២០២២ក្រោមប្រធានបទ TVETបង្កើនផលិតភាពការងារនិងភាពប្រកួតប្រជែង

 

  ខេត្តស្វាយរៀង ៖ ព្រឹកថ្ងៃពុធ ០១រោច ខែ ជេស្ឋ ឆ្នាំខាល ចត្វាស័ក ព ស២៥៦៦ ត្រូវនឹងថ្ងៃពុធ ទី១៥ ខែមិថុនា ឆ្នាំ២០២២ ឯកឧត្តម រស់ ផារិទ្ធ អភិបាលរងខេត្តស្វាយរៀង បានថ្លែងស្នើដល់លោក លោកស្រី និងអ្នកពាក់ព័ន្ធក្នុងវិស័យវិនិយោគទាំងអស់នៅក្នុងខេត្តស្វាយរៀង ដែលបានចូលរួមសហការជាមួយវិទ្យាស្ថានពហុបច្ចេកទេស ភូមិភាគតេជោសែនស្វាយរៀង ក្នុងការកំណត់មុខជំនាញសិក្សា និងការអភិវឌ្ឍ កម្មវិធីសិក្សា ដើម្បីឲ្យស្របតាម ស្ថានភាពទីផ្សារការងារបច្ចុប្បន្ន និងចូលរួមសហការក្នុងការផ្ដល់ទីកន្លែងសម្រាប់សិក្ខាកាម សិស្ស-និស្សិត ក្នុងការចុះកម្មសិក្សា ក៏ដូចជាទទួលសិក្ខាកាម សិស្ស-និស្សិត ឲ្យចូលបម្រើការងារនៅពេលបញ្ចប់ការសិក្សាផងដែរ ។

    ការថ្លែងរបស់ឯកឧត្តមអភិបាលខេត្តរង រស់ ផារិទ្ធិ បែបនេះ ខណៈដែលឯកឧត្តមតំណាងឲ្យឯកឧត្តម  ម៉ែន វិបុល អភិបាលខេត្តស្វាយរៀង ក្នុងពិធីអបអរសាទរទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈលើកទី៥ ឆ្នាំ ២០២២ ក្រោមប្រធានបទ TVET បង្កើនផលិតភាពការងារ និងភាពប្រកួតប្រជែងខ្ពស់ ។

   ឯកឧត្តមនូវបានបន្តទៀតថា  ក្នុងនាងអភិបាលខេត្តស្វាយរៀងចំពោះលោកលោកស្រីដែលបានអញ្ជើញចូលរួមក្នុងកម្មវិធីទិវាជាតិអប់រំបណ្ដុះបណ្ដាលបច្ចេកទេសវិជ្ជាជីវៈដើម្បីបង្កើនការយល់ដឹងឲ្យកាន់មានប្រសិទ្ធភាពខ្ពស់ច្បាស់លាស់ និងបង្កើនការចុះឈ្មោះចូលរៀនដើម្បីបណ្ដុះបណ្ដាលក៏ដូចជាបង្កើនកិច្ចសហប្រតិបត្តិការរវាងសាលារដ្ឋនឹងសាលាឯកជនផងដែរពិសេសគឺលើកកម្ពស់ផលិតភាពការងារនិងការប្រកួតប្រជែងខ្ពស់ក្នុងបរិបទសកលភាវូពាណិជ្ជកម្មនិងការងារ ។

   ឯកឧត្តមបានបន្តថា ចំពោះវិស័យវិនិយោគឯកជន ក៏កំពុងមានការរីកចម្រើនគួរឲ្យកត់សម្គាល់ផងដែរ ជាក់ស្ដែងនៅទូទាំងខេត្ត មានតំបន់សេដ្ឋកិច្ចពិសេសចំនួន ១២កន្លែង កំពុងដំណើរការ ៩កន្លែង មានរោងចក្រ សហគ្រាស ក្រុមហ៊ុនឯកជន គ្រឹះស្នានមីក្រូហិរញ្ញវត្ថុ សរុបមានចំនួន ២៤៨កន្លែង ដែលបានបង្កើតការងារជូនប្រជាពលរដ្ឋ ឱ្យមានការងារធ្វើបានប្រមាណជា ៩៧.០០០នាក់។

    ឯកឧត្តមបានបន្តថា រាជរដ្ឋាភិបាលក្រោមការដឹកនាំរបស់សម្ដេចតេជោហ៊ុន សែន ជាប្រមុខដឹកនាំប្រកបដោយគតិបណ្ឌិត បានដាក់ចេញនូវផែនការសកម្មភាពនិងយុទ្ធសាស្ត្រប្រកបដោយអភិបាលកិច្ចល្អ ជាពិសេសតាមរយៈការដាក់ចេញនូវ  គោលនយោបាយជាយុទ្ធសាស្ត្រក្នុងការបង្កើនភាពស៊ាំនៅក្នុងសហគមន៍ ទប់ទល់នឹងការឆ្លងរាលដាលនៃជំងឺកូវីដ-១៩ ដោយបានស្រោចវ៉ាក់សាំងការពារជំងឺកូវីដ-១៩ ចាក់ជូនប្រជាពលរដ្ឋដោយឥតគិតថ្លៃ ជាពិសេសបានអនុវត្តន៍វិធានការការ ៣ ការពារនិង ៣ កុំ របស់សម្តេចតេជោ ហ៊ុន សែន ព្រមទាំងវិធានការនានា របស់ក្រសួងសុខាភិបាលផងដែរ។

   បើតាមលោក មុត ចិន្តា នាយកវិទ្យាស្ថាន ពហុបច្ចេកទេស ភូមិភាគតេជោសែនស្វាយរៀង បានឲ្យដឹងថា វិទ្យាស្ថានពហុបច្ចេកទេសភូមិភាគតេជោ សែនស្វាយរៀង មានបណ្ដុះបណ្តាលលើជំនាញជាច្រើន វិស្វកម្ម អគ្គិសនី វិស្វកម្មអេឡិចត្រូចនិ វិស្វកម្មយន្តសាស្ត្ររថយន្ត វិស្វកម្មមេកានិកទូទៅ វិស្វកម្មសំណង់ស៉ីវិល បរិក្ខារត្រជាក់ឧស្សាហកម្ម វិទ្យាសាស្ត្រកុំព្យូទ័រ គ្រប់គ្រង គណនេយ្យ និងហិរញ្ញវត្ថុ និងមានជំនាញជាច្រើនទៀត ស្របតាមតម្រូវការទីផ្សារការងារ។

   លោកបានបន្តថា វិទ្យាស្ថានបានបណ្តុះបណ្តាលចាប់ពីកម្រិតវិញ្ញាបនបត្រ រហូតដល់កម្រិតបរិញ្ញាបត្រ (ដោយសិក្សាចាប់ពី មួយសប្ដាហ៍ រហូតដល់៥ឆ្នាំ)។ក្នុងនោះដើម្បីជំរុញកំណើននៃការចុះឈ្មោះចូលរៀន សម្រាប់កម្រិតសញ្ញាបត្រជាន់ខ្ពស់បច្ចេកទេស/បរិញ្ញាបត្ររង លើជំនាញ វិស្វកម្មអគ្គិសនី វិស្វកម្មមេកានិកទូទៅ វិស្វកម្មអេឡិចត្រូនិក និងវិស្វកម្មស្វ័យប្រវត្តិកម្ម និស្សិត៤០% ដែលភាគច្រើនជានារី និងនិស្សិតរៀនពូកែនឹងទទួលបានអាហារូបករណ៍១ខែ ៦០ដុល្លារ រយៈពេល១០ខែ ក្នុង១ឆ្នាំសិក្សា។ វិទ្យាស្ថាន បានខិតខំលើកកម្ពស់ការបណ្ដុះបណ្ដាល និងការងារ ដើម្បីបង្កើនផលិតភាព និងភាពប្រកួត ប្រជែង ដោយខិតខំស្វែងរកដៃគូ ដូចជារោងចក្រ សហគ្រាស ដើម្បីសិស្ស និស្សិតចុះហាត់ការការងារ និងកម្ម សិក្សាការងារ ជាពិសេសស្វែងរកការងារជូននិស្សិតក្រោយបញ្ចប់ការសិក្សាស្របតាមជំនាញ និងសមត្ថភាពរបស់សិស្ស និស្សិត ។

   ក្នុងនាមវិទ្យាស្ថានតេជោសែនស្វាយរៀង មន្ទីរការងារ និងបណ្តុះបណ្តាលវិជ្ជាជីវៈ ខេត្តស្វាយរៀង លោកពិតជាមានសុទិដ្ឋិនិយមថា នាពេលអនាគតដ៏ខ្លីខាងមុខ ការផ្លាស់ប្តូរឥរិយាបថរបស់សិស្ស និស្សិត និងមានការគាំទ្រពីអាណាព្យាបាល ដោយចាប់យកជំនាញបច្ចេកទេស និងបច្ចេកវិទ្យាថ្មីៗ គឺដើម្បីលើក កម្ពស់គុណភាពជីវិតរបស់ខ្លួន បង្កើនកម្រិតជីវភាពរបស់ខ្លួន បង្កើនផលិតភាព ជាពិសេសគឺភាពប្រកួតប្រជែង ខ្ពស់ នៅលើទីផ្សារការងារនាពេលបច្ចុប្បន្ននេះ ដែលស្របទៅនឹងចក្ខុវិស័យរបស់រាជរដ្ឋាភិបាលកម្ពុជាឆ្នាំ២០៥០ កម្ពុជាជាប្រទេសមានប្រាក់ចំណូលខ្ពស់ ឬប្រទេសអភិវឌ្ឍន៍ ។