មិនដឹងថាមានវិបត្តិអ្វី គូស្នេហ៍មួយគូចាក់សាំងដុតសម្លាប់ខ្លួន ឆេះផ្អើលផ្ទះសំណាក់ ៧៧៧៧

 

 ចេញផ្សាយ ថ្ងៃទី27 ខែកុម្ភៈ ឆ្នាំ2023
(ខេត្តស្វាយរៀង): នៅផ្ទះសំណាក់យីហោ ៧៧៧៧  មានករណីធ្វើអត្តឃាតចាក់សាំងដុតខ្លួនឯងបណ្តាលឱ្យឆេះស្លាប់ ប្រុសស្រី២នាក់ បង្កការភ្ញាក់ផ្អើលដល់ម្ចាស់ផ្ទះសំណាក់ និងសមត្ថកិច្ចទាំងព្រឹក។ ហេតុការណ៍នេះបានកើតឡើងកាលពីវេលាម៉ោង៧និង៤០នាទីព្រឹក ថ្ងៃទី២៧ ខែកុម្ភៈ ឆ្នាំ២០២៣ នៅត្រង់ចំណុចផ្ទះសំណាក់យីហោការ៉េ៧ ស្ថិតក្នុងភូមិតាណែង ឃុំសង្កែ ស្រុករំដួល ខេត្តស្វាយរៀង។
យោងតាមលោក មាស ធួក អធិការនគរបាលស្រុករំដួល បានអោយដឹងថា: អ្នកស្លាប់មានឈ្មោះ វ៉ន ញ៉ាញ់ ភេទប្រុស អាយុ៣២ឆ្នាំ មានទីលំនៅភូមិថ្មី ឃុំស្វាយចេក ស្រុករំដួល និងឈ្មោះ អាន ចិន្តា ភេទស្រី អាយុ១៧ឆ្នាំ មានទីលំនៅភូមិព្រែកពក ឃុំថ្នាធ្នង់ ស្រុករំដួល។
លោកអធិការបន្តថា សមត្ថកិច្ចបានទទួលព័ត៌មានពីប្រជាពលរដ្ឋថា នៅត្រង់ចំណុចផ្ទះសំណាក់៧៧៧៧ មានអគ្គិភ័យមួយកើតឡើង។ ក្រោយពីទទួលព័ត៌មានភ្លាម កម្លាំងជំនាញបច្ចេកទេសស្រុក បានសហការជាមួយជំនាញខេត្ត និងលោកវេជ្ជបណ្ឌិត នៃមន្ទីពេទ្យបង្អែកសាមគ្គីរំដួល ដោយមានការសម្របសម្រួលពីលោក បូរា  អង្គប្រទាន ព្រះរាជអាជ្ញារងសាលាដំបូងខេត្តស្វាយរៀង ចុះដល់កន្លែងកើតហេតុដើម្បីពិនិត្យហើយឃើញថា នៅបន្ទប់លេខ១៩ មានមនុស្សស្លាប់ចំនួន២នាក់ ។
ប្រភពបន្តថា ក្រោយពិនិត្យរួចសមត្ថកិច្ចបានសន្និដ្ឋានថា សាកសពស្លាប់ដោយសារធ្វើអត្តឃាតចាក់សាំងដុតខ្លួនឯង ដោយសារមូលហេតុមានវិបត្តិស្នេហា។
តាមការបំភ្លឺរបស់ឈ្មោះ ជំ ស៊ីថា ភេទប្រុស អាយុ៤៨ឆ្នាំ ជាម្ចាស់ផ្ទះសំណាក់បានឱ្យដឹងថា: នៅថ្ងៃទី២៦ ខែកុម្ភៈ ឆ្នាំ២០២៣ វេលាម៉ោង៦ល្ងាច មានមនុស្សប្រុសស្រី២នាក់ បានជិះម៉ូតូមួយគ្រឿងមកជួលបន្ទប់លេខ១៩របស់ខ្លួន ដើម្បីសម្រាក១យប់ រហូតដល់ម៉ោង៧និង៣០នាទីព្រឹក ស្រាប់តែមានភ្លើងឆេះចេញពីបន្ទប់ដែលអ្នកទាំងពីរជួល ទើបបង្កការភ្ញាក់ផ្អើលតែម្តង។
ក្រោយពិនិត្យចប់រួចរាល់សាកសពត្រូវបានសមត្ថកិច្ចធ្វើកំណត់ហេតុ និងបានប្រគល់អោយក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួល៕ ដោយៈRTN