កាកបាទក្រហមកម្ពុជា និងក្រុមការងារឥស្សរជនឆ្នើមថ្នាក់ជាតិ ចុះអប់រំសុខភាព និងផ្ដល់អំណោយ ជូនស្ត្រីមានផ្ទៃពោះ និងទើបសម្រាលកូន នៅមណ្ឌលសុខភាព ប៊ុន រ៉ានី ហ៊ុនសែន រុនតាឯក

(សៀមរាប)៖ កាកបាទក្រហមកម្ពុជា និងក្រុមការងារឥស្សរជនឆ្នើមថ្នាក់ជាតិ បានបន្ដដំណើរបេសកកម្មរបស់ខ្លួនជាបន្ដបន្ទាប់ ដើម្បីចូលរួមលើកកម្ពស់សុខភាព និងជីវភាពរបស់ប្រជាពលរដ្ឋនៅក្នុងសហគមន៍។

ជាក់ស្ដែងនៅថ្ងៃទី១៨ ខែមករា ឆ្នាំ២០២៤ លោកស្រី ម៉ែន នារីសោភ័គ អគ្គលេខាធិការស្តីទី កាកបាទក្រហមកម្ពុជា និងជាអនុប្រធានអចិន្ត្រៃយ៍ក្រុមការងារឥស្សរជនឆ្នើមថ្នាក់ជាតិ និងលោកស្រី ទុយ ជិ ប្រាក់សោភ័ណ អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានអញ្ជើញជួបសំណេះសំណាល សួរសុខទុក្ខ និងចែកអំណោយមនុស្សធម៌ ជូនដល់ស្ត្រីមានផ្ទៃពោះ និងស្ត្រីទើបសម្រាលកូនតូចចំនួន ២០នាក់ នៅមណ្ឌលសុខភាព ប៊ុន រ៉ានី ហ៊ុនសែន រុនតាឯក ដែលស្ថិតក្នុងឃុំរុនតាឯក ស្រុកបន្ទាយស្រី ខេត្តសៀមរាប។

ក្នុងឱកាសនោះ លោកស្រី ម៉ែន នារីសោភ័គ បានសម្តែងនូវក្តីសោមនស្សរីករាយ និងបានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិកឆ្លើយតបមេរោគអេដស៍ជំងឺអេដស៍ និងការអភិវឌ្ឍនៅកម្ពុជា និងជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ ដែលផ្តាំផ្ញើសួរសុខទុក្ខ និងសារអប់រំសុខភាព ស្តីពីអត្ថប្រយោជន៍នៃការមកពិនិត្យផ្ទៃពោះឱ្យបានទៀងទាត់, ពិនិត្យផ្ទៃពោះឱ្យបានយ៉ាងតិច ៤ដង មុនពេលសម្រាល, ការទទួលទានអាហារូបត្ថម្ភ បន្លែធម្មជាតិ ដើម្បីសុខភាពល្អទាំងម្តាយ និងទារកក្នុងផ្ទៃ, កុំបរិភោគផ្អែមពេក-ប្រៃពេក ដែលអាចបង្កជាជំងឺផ្សេងៗ ដូចពាក្យចាស់ពោលថា «ស្រឡាញ់ខ្លួន ឱ្យស្ងួនចំណី», «ការពារប្រសើរជាងព្យាបាល», «ញាំអាហារជាថ្នាំ កុំញាំថ្នាំជាអាហារ»ជាដើម។

ទន្ទឹមនឹងនោះលោកស្រី ម៉ែន នារីសោភ័គ ក៏បានអំពាវនាវលើកទឹកចិត្ដ ដល់ស្ដ្រីជាម្ដាយដែលទើបសម្រាលកូននៅមណ្ឌលសុខភាព សូមបំបៅកូនដោយទឹកដោះម្តាយ, បន្តពិនិត្យសុខភាពក្រោយពេលសម្រាល, ចាក់វ៉ាក់សាំងបង្ការដល់ទារក ចំណែកឯម្តាយត្រូវចាក់វ៉ាក់សាំងបង្ការជំងឺមហារីកមាត់ស្បូន និងជំងឺមហារីកសុដន់ជាដើម។ លើសពីនេះ សូមឱ្យស្ត្រីជាមាតាទាំងអស់ត្រូវរស់នៅមានអនាម័យ ផឹកទឹកឆ្អិន បរិភោគអាហារមានជីវជាតិគ្រប់គ្រាន់ អាហារូបត្ថម្ភត្រឹមត្រូវ និងបន្តប្រកបរបរចិញ្ចឹមជីវិតដើម្បីជីវភាពគ្រួសារ។

ជាការឆ្លើយតបរបស់ស្ដ្រីដែលមកទទួលសេវាពិនិត្យផ្ទៃពោះ និងសម្រាលកូននៅមណ្ឌលសុខភាព ប៊ុន រ៉ានី ហ៊ុនសែន រុនតាឯក បានថ្លែងអំណរគុណយ៉ាងជ្រាលជ្រៅ ជូនចំពោះ មាតាមនុស្សមនុស្សធម៌ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែខ្វល់ខ្វាយពីសុខទុក្ខប្រជាពលរដ្ឋទាំងអស់ ពិសេសអ្នកដែលងាយរងគ្រោះបំផុត។ សម្រាប់ថ្ងៃនេះវិញ មាតាមនុស្សមនុស្សធម៌ បានចាត់តំណាងចុះមកសួរសុខទុក្ខ អប់រំផ្សព្វផ្សាយពីសុខភាព ដើម្បីជួយលើកកម្ពស់សុខភាពមាតា និងទារកនៅកម្ពុជា ឱ្យកាន់តែមានភាពល្អប្រសើរ ដែលបានធ្វើឱ្យពលរដ្ឋមានភាពកក់ក្ដៅ និងសប្បាយរីករាយក្រៃលែង។

ជាមួយគ្នានោះដែរប្រជាពលរដ្ឋដែលមកទទួលសេវាសុខភាពនៅមណ្ឌលសុខភាពខាងលើនេះ ក៏បានបង្ហាញពីការពេញចិត្ដ ចំពោះការផ្ដល់សេវាសុខភាព របស់ក្រុមគ្រូពេទ្យផងដែរ។

សូមជម្រាបថា កាកបាទក្រហមកម្ពុជា និងក្រុមការងារឥស្សរជនឆ្នើមថ្នាក់ជាតិ បន្ទាប់ពីផ្ដល់សារអប់រំសុខភាព ក៏បានផ្ដល់អំណោយមនុស្សធម៌ ដល់ស្ត្រីជាមាតាទាំង ២០គ្រួសារ ដោយគ្រួសារនីមួយៗទទួលបាន៖ អង្ករអាហារូបត្ថម្ភ ២គីឡូក្រាម, ឃីត (មុង ភួយ សារុង ក្រមា) ១កញ្ចប់, កន្សែងពោះគោ ១, សាប៊ូដុសខ្លួន ២ដុំ និងថវិកា ៥ម៉ឺនរៀល៕