ខេត្តស្វាយរៀង ៖ ពិតជារន្ធត់ណាស់ អតីតទាហានវ័យ៦៩ឆ្នាំចូលនិវត្តន៍ម្នាក់ ត្រូវសមត្ថកិច្ចចាប់ខ្លួនពីបទគប់គ្រា.ប់បែក បណ្តាលឲ្យមនុស្សចាស់ក្មេងចំនួន៦នាក់បានរងរបួសធ្ងន់-ស្រាល ក្នុងនោះមានក្មេងប្រុសស្រីអាយុ៣ឆ្នាំចំនួន២នាក់ផងដែរ មូលហេតុបណ្តាលមកពីទំនាស់ព្រំដី។ ករណីនេះ បានកើតឡើងកាលពីវេលាម៉ោង៨និង១០នាទីយប់ ថ្ងៃទី៧ ខែមីនា ឆ្នាំ២០២៣ ស្ថិតនៅក្នុងភូមិព្រៃគាវ ឃុំកំពង់ចក ស្រុករំដួល។
បើតាមសមត្ថកិច្ចនគបាលប៉ុស្តិ៍រដ្ឋបាលឃុំកំពង់ចក បានឲ្យដឹងថា ករណីគប់គ្រា.ប់បែក បណ្តាលឲ្យមនុស្សប្រុស្រីចំនួន០៦នាក់រងរបួសធ្ងន់-ស្រាលនោះ បង្កឡើងដោយជនសង្ស័យម្នាក់មានឈ្មោះ អ៊ុ ផា ភេទប្រុស អាយុ៦៩ឆ្នាំ អតីតជាទាហានចូលនិវត្តន៍ មានទីលំនៅក្នុងភូមិកើតហេតុខាងលើ។ ហើយជនរងគ្រោះរងរបួសធ្ងន់-ស្រាល០៦នាក់ខាងលើ ក្នុងនោះកុមារចំនួន០២នាក់ផងដែរ។
សមត្ថកិច្ចបន្តថា ជនរងគ្រោះខាងលើ រួមមាន ៖ ទី១- ឈ្មោះ ជេត ចាន់ថន ភេទប្រុស អាយុ៦៤ឆ្នាំ មុខរបរកសិករ រងបួសធ្ងន់ (ដោយសារមានជំងឺទឹកនោមផ្អែមប្រចាំកាយ)។ ទី២- ឈ្មោះ ហ៊ឹង សុវណ្ណ ភេទស្រី អាយុ៦៣ឆ្នាំ ជាប្រពន្ធ របួសធ្ងន់។ ទី៣- ឈ្មោះ ជេត សុភ័ក្រ ភេទស្រី អាយុ២៥ឆ្នាំ ជាកូន របួសធ្ងន់។ ទី៤- ឈ្មោះ នី ម៉ីម៉ី ភេទស្រី អាយុ០៣ឆ្នាំ របួសស្រាល។ ទី៥- ឈ្មោះ ប៉ែន សេថា ភេទស្រី អាយុ៥៦ឆ្នាំ របួសស្រាល និងទី៦- ឈ្មោះ បេ ចំណាប់ ភេទប្រុស អាយុ៣ឆ្នាំ របួសស្រាល។ ជនរងគ្រោះទាំង៦នាក់នេះ មានទីលំនៅភូមិព្រៃគាវ ឃុំកំពង់ចកស្រុករំដួល។ ក្រោយពេលកើតហេតុ សមត្ថកិច្ចបានហៅរថយន្តសាមុយដឹកបញ្ជូនជនរងគ្រោះទាំង៦នាក់ខាងលើទៅមន្ទីរពេទ្យបង្អែកសាមគ្គីរំដួល ដើម្បីសង្គ្រោះផងដែរ។
បើតាមប្រភពពីអាជ្ញាធរស្រុករំដួល បានឲ្យដឹងថា កន្លងមក គ្រួសារជនសង្ស័យឈ្មោះ អ៊ុ ផា បានកើតមានជម្លោះជាមួយនឹងគ្រួសារជនរងគ្រោះរឿងទំនាស់ព្រំដី ដែលមានផ្ទះជាប់ភូមិរបងជាមួយគ្នា ហើយមិនទាន់ដោះស្រាយបញ្ចប់នៅឡើយ។ លុះនៅថ្ងៃកើតហេតុ ជនសង្ស័យបានផឹកស្រាស្រវឹង ក៏បង្កទំនាស់ឈ្លោះប្រកែកជាមួយគ្រួសារជនរងគ្រោះ ហើយជនសង្ស័យជាអតីតទាហាន ដែលបានលាក់គ្រា.ប់បែកទុកជាយូរឆ្នាំមកហើយតាំងពីសម័យសង្គ្រាម ហើយខណៈពេលបញ្ចប់សង្គ្រាម អាជ្ញាធរបានប្រកាសឲ្យប្រជាពលរដ្ឋ ឬអតីតទាហានរំសាយ រួចប្រគល់អាវុធជាតិផ្ទុះឲ្យអាជ្ញាធរ ដើម្បីរក្សាទុក ក៏ប៉ុន្តែជនសង្ស័យរូបនេះ មិនបានប្រគល់គ្រា.ប់បែក១គ្រា.ប់នេះឲ្យសមត្ថកិច្ចទេ ដោយបានលាក់ទុករហូតមកដល់បច្ចុប្បន្ននេះ។
ប្រភពដដែលបន្តថា ហើយនៅពេលមានទំនាស់ជាមួយអ្នកជិតខាងរឿងព្រំដី លុះទៅផឹកស្រារហូតស្រវឹង ក៏បានទៅយកគ្រា.ប់បែកដែលខំលាក់ទុកនោះ មកគប់ចូលផ្ទះរបស់ជនរងគ្រោះ បណ្តាលឲ្យផ្ទុះរងរបួសធ្ងន់-ស្រាលចំនួន០៦នាក់តែម្តង ហើយរងរបួសទាំងអ្នកជិតខាងដែលមិនបានមានទំនាស់គ្នាចំនួន២នាក់យាយនិងចៅប្រុសអាយុ០៣ឆ្នាំ ដែលគ្មានកំហុសផងដែរ។
ក្រោយពេលកើតហេតុ ជនសង្ស័យខាងលើ ត្រូវបានសមត្ថកិច្ចចាប់ឃាត់ខ្លួនបានភ្លាមៗផងដែរ ហើយបានបញ្ជូនទៅកាន់អធិការដ្ឋាននគបាលស្រុករំដួល ដើម្បីធ្វើការសាកសួរ។ ហើយនៅព្រឹកថ្ងៃទី៨ ខែមីនា ឆ្នាំ២០២៣នេះ ក៏បានកសាងសំណុំរឿងបញ្ជូនខ្លួនជនសង្ស័យមកកាន់ការិយាល័យព្រហ្មទណ្ឌ នៃស្នងការដ្ឋាននគបាលខេត្តស្វាយរៀង ដើម្បីចាត់ការបន្តតាមនីតិវិធីច្បាប់ផងដែរ៕ដោយRTN
No comments:
Post a Comment