គណៈប្រតិភូរដ្ឋបាលខេត្តតាកែវ និងសប្បរសជន បាននាំយកអំណោយ «មហាគ្រួសារខ្មែរ» ចេញពីទឹកចិត្តរបស់បងប្អូនប្រជាពលរដ្ឋ ទូទាំងខេត្តតាកែវ ជូនដល់បងប្អូនប្រជាពលរដ្ឋ ភៀសសឹក ពីការឈ្លានពានរបស់កងទ័ពថៃ ដែលកំពុងស្នាក់នៅទីតាំងសុវត្ថិភាព

ខេត្តឧត្តរមានជ័យ៖ នាថ្ងៃព្រហស្បតិ៍ ៦កើត ខែស្រាពណ៍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៣១ ខែកក្កដា ឆ្នាំ២០២៥ វេលាម៉ោង ១២៣០នាទីរសៀល នេះឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានដឹកនាំគណៈប្រតិភូរដ្ឋបាលខេត្ត និងសប្បរសជន នាំយកអំណោយ «មហាគ្រួសារខ្មែរ» ចេញពីទឹកចិត្តរបស់បងប្អូនប្រជាពលរដ្ឋ ទូទាំងខេត្តតាកែវ ចំនួន ៦រថយន្តធំៗ មានដូចជាគ្រឿងឧបភោគបរិភោគ សម្ភារៈប្រើប្រាស់ ថ្នាំពេទ្យ និងថវិកា ៤០.០០០.០០០រៀល មកប្រគល់ជូន រដ្ឋបាលខេត្តឧត្តរមានជ័យ ដើម្បីចាត់ចែង បន្តចែកជូនដល់បងប្អូនប្រជាពលរដ្ឋ ភៀសសឹក ពីការឈ្លានពានរបស់កងទ័ពថៃ ដែលកំពុងស្នាក់នៅទីតាំងសុវត្ថិភាព ស្ថិតនៅភូមិសាស្រ្តស្រុកបន្ទាយអំពិល ខេត្តឧត្តរមានជ័យ ។