អភិបាលស្រុកនិងព្រះមន្ត្រីសង្ឃសាលាអនុគណស្រុកស្ទោងអញ្ជើញសួរសុខទុក្ខម្ចាស់ផ្ទះដែលត្រូវភ្លើងឆេះនៅឃុំម្សាក្រង

ខេត្តកំពង់ធំ៖លោក សាយ គឹមឡម អភិបាលស្រុកស្ទោងនិងសហការីព្រមទាំងព្រះបរិត្តកោសល្យណិប អ៊ាន ព្រះអនុគណស្រុកព្រមទាំងព្រះមន្ត្រីសង្ឃសាលាអនុគណស្រុកស្ទោង បាន
អញ្ជើញនិងនិមន្តសួរសុខទុក្ខ ម្ចាស់ផ្ទះដែលត្រូវបានអគ្គីភ័យលេបត្របាក់ទាំងស្រុងកាលពីរាត្រីទៀបភ្លឺថ្ងៃទី ៧ខែកញ្ញា ឆ្នាំ ២០២៤ នៅភូមិសំប៉ាន ឃុំ ម្សាក្រង ស្រុកស្ទោង ខេត្តកំពង់ធំ។

ថ្លែងនៅក្នុងឱកាសនេះលោកបានសម្ដែងនូវសមានចិត្តដ៏ក្រៀមក្រំចូលរួមរំលែកទុក្ខនិងសោកស្ដាយជាមួយម្ចាស់ផ្ទះដែលបាត់បង់នូវផ្ទះ និងទ្រព្យសម្បត្តិជាទីស្រឡាញ់តែមួយប៉ប្រិចភ្នែក។

មួយនេះផងដែរ លោកបានអំពាវនាវដល់ប្រជាពលរដ្ឋក្នុងមូលដ្ឋាន សូមមានការប្រុងប្រយ័ត្នពីបញ្ហាអគ្គិភ័យជាតិហេតុជាពិសេស ជាពិសេសត្រូវបិទបារ៉ែតឬផ្ដាច់ចរន្តអគ្គិសនីនៅពេលដែលម្ចាស់ផ្ទះមិននៅ ហើយត្រូវតភ្ជាប់ប្រព័ន្ធអគ្គិសនីនៅតាមផ្ទះរបស់ខ្លួនតាមបទដ្ឋានបច្ចេកទេសជាមួយនឹងជាងដែលមានជំនាញពិតប្រាកដដើម្បីធានានូវសុវត្ថិភាពខ្ពស់។

លើសពីនេះ លោកអភិបាលស្រុកស្ទោងបានថ្លែងអំណរព្រះគុណនិងអរគុណជាអនេកដល់ព្រះមន្ត្រីសង្ឃស្រុកស្ទោងក៏ដូចជាសប្បុរសជននិងញាតិមិត្តជិតឆ្ងាយដែលបាននិមន្តនិងអញ្ជើញចូលរួមរំលែកការសោកស្ដាយហើយបានឧបត្ថម្ភនូវសម្ភារៈថវិការចូលរួមសោកស្តាយម្ចាស់ផ្ទះនៅក្នុងឱកាសនេះ។

ទន្ទឹមនឹងនេះ លោកវីរៈសេនីយ៍ទោជឹម រីណា អធិការស្រុកស្ទោង បញ្ជាក់ឱ្យដឹងថា ម្ចាស់ផ្ទះខាងលើឈ្មោះ ភិន ថុល ភេទ ប្រុស អាយុ៦០ឆ្នាំ  ផ្ទះមានទំហំ៧មx១១,៥ម ធ្វេីអំពីឈេីប្រក់ក្បឿង  ពុំបណ្តាលអោយមនុស្សរងរបួសទេ ហើយខូចខាតឯកសាររួមមានសៀវភៅស្នាក់នៅ សៀវភៅគ្រួសារ សំបុត្របញ្ជាក់កំណេីត អត្តសញ្ញាណប័ណ្ណ គ្រឿងសង្ហារឹមនិងសំភារៈមួយចំនួនធំ ដែលបណ្តាលមកពីឆ្លងចរន្តអគ្គីសនី ហើយប្រើប្រាស់រថយន្តពន្លត់អគ្គីភ័យចំនួន០១គ្រឿងរបស់អធិការដ្ឋាននគរបាលស្រុកស្ទោងនិងប្រើប្រាស់កម្លាំងនគរបាលចំនួន១៤នាក់។

លើសពីនេះលោកសាយ គឹមឡម បានណែនាំដល់អធិការនគរបាលស្រុកស្ទោង ត្រូវជួយសម្របសម្រួលធ្វើឯកសារអត្តសញ្ញាណប័ណ្ណនិងអត្រានុកូលដ្ឋានជូនម្ចាស់ផ្ទះឡើងវិញឲ្យបានដល់ផ្ទះនិងឆាប់បំផុតដើម្បីបានប្រើប្រាស់តាមស្ថានភាពជាក់ស្ដែង។

គួរបញ្ជាក់ថា នៅក្នុងឱកាសនេះ លោកអភិបាលស្រុកស្ទោងនិងព្រះមន្ត្រីសង្ឃ ព្រមទាំងសប្បុរសជនជិតឆ្ងាយបាន ឧបត្ថម្ភនូវគ្រឿងឧបភោគបរិភោគ សម្ភារប្រើប្រាស់ សម្លៀកបំពាក់ព្រមទាំងថវិកាចំនួន ១,៥៤២,០០០រៀផងដែរ។